(Маврово, 27-28.09.2013 година)
Од 27-28 септември 2013 година во хотел Срна – Маврово, Синдикатот на администрацијата и државната управа на Македонија со поддршка на Фондацијата Фридрих Еберт, канцеларија во Скопје, организираше семинар за зајакнување на капацитетите на синдикалните претставници со цел нивно адекватно подготвувње заради практична имплементација на одредбите од Законот за заштита од вознемирување на работното место, или популарно наречено ,,мобинг,,.
Предавач на овој семинар беше д-р Лазар Јовевски, доцент на Правниот факултет ,,Јустинијан Први,, во Скопје, кој на еден мошне неформален и интересен начин им го доближи законот на учесниците на овој семинар и соодветно ги подготви за нивната улога која ќе ја имаат во своите работни средини во насока на спречување на појавите на вршење на психичо или полово вознемирување на работното место за членовите на синдикатот.
“Мобингот, истакна д-р Јовевски, треба да се разгледува низ призмата на заштитата на здравјето и безбедноста при работа на вработениот како дел од севкупната заштита на неговата личност. Причините за мобинг се поврзани со конфликтите на работа и по правило се појавуваат како последица на пореметени меѓучовечки односи помеѓу вработените или меѓу вработениот и работодавачот. Моберот/ите најчесто е надредено лице кое систематски и подолг период го застаршува другото лице со намера за оспорување на неговиот професионален углед и моралниот интегритет, професионалното и човечко достоинство со цел создавање на неподносливи услови за работа при што жртвата на мобингот се наоѓа во речиси беспомошна положба. Причините за таквото однесување се најчесто субјективни недостатоци на моберот (егоизам, нетрпеливост, страв, желба за напредување по секоја цена, чувство на загрозеност на работата итн.). Многу пати непрепознавањето на мобингот и непревземањето на мерки за заштита предизвикува огромни штети во работењето поради намалена продуктивност, трошоци поврзани со користење на боледувања од страна на жртвата итн’’.
Бидејќи мобингот е специфичен феномен кој честопати се меша со некој други појавни ситуации на работното место, како што е на пример стресот предизвикан од работа со странки, кратки рокови и сл., а со цел да можат навреме да ги препознаат случаите на мобинг во своите работни средини и соодветно да реагираат со цел превенирање на овие состојби, учесниците беа вклучени во работилница каде поделени во три групи имаа за задача да наведат по еден случај, по еден пример за психолошки притисок врз вработен во својата организација и да го анализираат од аспект на последиците кој таа ситуација ја имала по вознемируваното лице. За жал едниот од наведените примери кој е вистинска случка имал поразителни последици, односно како последица на хоризонтален и вертикален мобинг кој го трпело лицето во една наша државна институција, крајниот исход бил катастрофален односно завршило со тешки последици по неговото здравје и на крај смрт.
Потоа беше анализирано прашањето за улогата на жртвата на мобингот односно дали таа самата во некој аспекти придонесува за тоа да биде во ,,улога,, на жртва и дали постои субјективен параметар кој влијае на тоа. Интересно е дека при психолошките истражувања е дојдено до заклучок дека пасивноста на средината (а не на жртвата) и на сведоците на мобингот играат клучна улога во развивањето на мобингот и страдањето на жртвата.
Затоа е добро што кај нас пред неколку месеци се донесе посебен закон за заштита од вознемирување на работното место, така што синдикалните претставници нема да бидат само неми сведоци на она што се случува во работната средина, туку ќе можат навреме да алармираат кај работодавачот и да бараат ваквите појави да се спречуваат, на потенцијалните жртви на мобинг законот им дава можност исто така да иницираат постапка за заштита од вознемирување на работното место кај својот работодавач или да побараат тоа да го стори претставникот на синдикатот, и на крајот секогаш како опција стои и можноста да се поведе спор доколку тоа неможе да се реши во една претходна постапка кај работодавачот.
На крајот на семинарот сите учесници добија по еден примерок од законот за заштита од вознемирување на работното место и по еден примерок од студијата која на оваа тема ја има напишано д-р Лазар Јовевски, и изразија надеж дека ќе продолжи соработката меѓу САДУ и Фридрих Еберт Фондацијата, а посебно соработката со д-р Јовевски на вакви и слични теми од областа на трудовото право пред се заради мошне ефикасниот и интересен начин на кој оваа тешко разбирлива тема им беше пренесена на учесниците.
